Nog baie vrae oor Blou Bul Bees
2010-08-30 06:44
Johannesburg – “Daar is soveel onbeantwoorde vrae. Ons is self nie doodseker wat gebeur het nie,” het mnr. James Adams, die Blou Bul-stut Bees Roux se agent, gister gesê.
Roux is sedert Vrydagoggend in aanhouding nadat hy na bewering ’n lid van die Tshwane-metropolisie so erg aangerand het dat hy aan sy beserings beswyk het.
Roux sal na verwagting vandag in die Pretoriase landdroshof om borgtog aansoek doen.
Volgens Adams sal daar ná die borgtogaansoek meer duidelikheid oor die omstandighede van die voorval wees.
“Die belangrikste ding is nou om Bees uit polisie-aanhouding te kry en om dit so vinnig as moontlik te doen,” het Adams bygevoeg.
Roux is Vrydag in die vroeë oggendure deur metropolisielede afgetrek omdat hy glo onder die invloed bestuur het. ’n Onderonsie het tussen Roux en sers. Ntshimane Johannes Mohale (38) ontstaan, waarna Roux hom glo aangerand het.
Mohale het op die toneel, op die hoek van Richard- en Schoemanstraat, aan sy beserings beswyk.
Lt.kol. Eugene Opperman, Gautengse polisiewoordvoerder, wou gister nie sê of selfverdediging deel van die polisie se ondersoek uitmaak nie.
“Al die aspekte en bewerings sal deel vorm van die ondersoek,” aldus Opperman.
Tientalle van Roux se vriende het hom op Facebook sterkte toegewens en gesê hulle bid vir hom. Die Blou Bulle is verbied om oor Roux te praat.
volg Nuus24 op Twitter.
- Die Burger