Nog 5 jaar om Millennium-mikpunte te bereik
2010-09-19 14:46
Johannesburg - Daar is slegs vyf jaar oor voor die spertyd vir die bereiking van die Millennium-ontwikkelingsmikpunte. Bugerlike samelewingsgroepe sê Suid-Afrika het vordering gemaak met sekere mikpunte, maar ander het agterweë gebly.
Die ag Millennium-mikpunte wat deur al die lidlande van die Verenigde Nasies (VN) aanvaar is, poog om onder meer armoede, siekte en geslagsongelykheid te bekamp.
Dié lande gaan by die Verenigde Nasies vergader van 20 tot 22 September om die vordering met die mikpunte te hersien.
President Zuma sal nie die vergadering bywoon nie, omdat hy dan by die ANC se Nasionale Algemene Raad sal wees.
Oor die algemeen het die regering dienslewering uitgebrei sedert 2000, het Jay Naidoo, voorsitter van die Globale Alliansie vir Verbeterde Voeding gesê. Naidoo is 'n voormalige minister wat verantwoordelik was vir die destydse Heropbou- en Ontwikkelingsplan.
"In terme van toegang tot onderwys en gesondheidsdienste en voorsiening van water en elektrisiteit doen ons goed," het Naidoo gesê.
Maar hy meen daar is 'n fokus op toegang tot openbare dienste eerder as wat daar op die gehalte van die dienste gefokus word. "Ons het baie vordering gemaak in terme van toegang tot onderwys, maar ons skole in die landelike gebiede is steeds disfunksioneel. Dit gaan oor gehalte van onderwys, nie net toegang nie."
Nog ‘n groot kwessie wat Suid-Afrika daarvan weerhou om die Millennium-mikpunte te bereik is, volgens Elroy Paulus van die menseregte-organisasie Black Sash, die hoë werkloosheidsyfer.
- SAPA