Nkandla-koste 'boubedryf se skuld'
2012-12-02 11:13
Johannesburg – Thulas Nxesi, minister van openbare werke, het erken dat die opknappingswerk wat by pres. Jacob Zuma se woning in Nkandla, KwaZulu-Natal gedoen is, die begroting oorskry het, het City Press Sondag berig.
"Dis in hierdie geval duidelik dat mense die begroting oorskry het," het Nxesi Donderdag aan die Kaya FM-aanbieder John Perlman gesê.
Hy het gesê 'n interne ondersoek oor die opknappingswerk deur die departement van openbare werke sal volgende week ten einde loop, waarna die bevindings gepubliseer sal word.
Nxesi het aan Perlman gesê dis "baie duidelik" dat die pryse wat betaal is vir die opknappingswerk "vreemd" is. Hy het dit op die boubedryf blameer, en gesê daar is 'n "goeie kans dat 'n mens uitgebuit word".
Hy het gesê die publiek het die reg om ontsteld te wees oor die bedrag wat spandeer is, wat volgens berigte sowat R250 miljoen is. Hy het egter gevra dat die departement 'n kans gegun word om die saak behoorlik te ondersoek.
– Volg Nuus24 op Twitter.
