Nkandla: Besonderhede oor projek 'vertroulik'
2012-10-05 15:17
Kaapstad – Nadere besonderhede oor die spesifieke onkoste wat aangegaan is om opknappingswerk aan pres. Zuma se woning by Nkandla te doen, sal nie bekendgemaak word nie omdat dit vertroulike inligting is, het die departement van openbare werke Vrydag gesê.
Thulas Nxesi, minister van openbare werke, het in 'n mediakonferensie gesê die departement sal nie die presiese bedrag bekendmaak wat deur die president self gedek is nie.
Die departement het ook gesê maatreëls in die ministeriële handboek kan nie gebruik word as maatstaf vir die staatshoof nie, omdat die president se benodigdhede meer is as dié van gewone ministers.
"Ons wil dit duidelik stel dat die ontwikkeling by Nkandla nie uniek is aan hierdie perseel nie; dit is dieselfde as die werk wat by enige van die ander soortgelyke eiendomme gedoen word," het Nxesi gesê.
"Toe pres. Zuma president geword het, het almal besef sekerheidsmaatreëls moet opgeskerp word. 'n Span kenners het die sekerheidsituasie hersien en aanbevelings gemaak. As deel van hierdie proses is nuwe kapasiteit aangevra in en om die privaat woning van pres. Zuma. Die benadering tot hierdie proses is gebaseer op die ontleding wat deur kenners gedoen is."
Dié aanbevelings het volgens die minister 'n rits spesifieke take ingesluit, soos die versterking van die eiendom se grense, die oprigting van sekerheidsheinings, die verskaffing van brandbestrydingstoerusting by helikopterplatforms, die opknapping van paaie in die gebied en die oprigting van 'n sekerheidsgebou. Voorsiening moes ook gemaak word vir water en 'n behoorlike rioolstelsel, 'n kliniek om mediese noodgevalle te hanteer, sowel as sekerheidstelsels vir al hierdie geriewe.
"Ons is bly om aan te kondig dat, hoewel daar 'n paar haakplekke was, ons aan die meeste van hierdie vereistes kon voldoen," het die minister gesê.
"Ons het hierdie werk gedoen terwyl die president ook besig was om sy eiendom teen sy eie koste op te gradeer."
Die City Press het vroeër berig dat die uitgebreide kompleks deur die departement van openbare werke opgegradeer word teen R203 miljoen.
Beeld het Vrydag berig dat die grond waarop die kompleks geleë is, deel is van kommunale grond in besit van die Ingonyama-trust, en nie deur pres. Jacob Zuma self besit word nie.
Die Ingonyama-trust bedryf 32% van alle grond in KwaZulu-Natal namens die staat. Dié trust staan onder leiding van koning Goodwill Zwelithini.
Die dagblad het berig dat die departement van openbare werke tans besig is om die huurkontrak op die grond oor te neem, en dat dit in die toekoms so min as R1 000 per jaar kan wees.
Zuma gebruik Nkandla as sy plattelandse wegbreekplek.
– Volg Nuus24 op Twitter.
