Nigeriese terroris skuldig bevind in Jhb-hof

2013-01-21 12:04

Johannesburg – Die Nigeriese terroris Henry Okah is Maandag skuldig bevind op aanklag dat hy die meesterbrein was agter twee bomaanvalle in Nigerië.

Regter Neels Claassen het in sy uitspraak in die Johannesburgse hooggeregshof gesê die staat het Okah se skuld bo redelike twyfel bewys.

Claassen het gesê omdat Okah nie getuig het nie, beteken dit die bewyse teen hom is onbetwis.

Altesaam 12 mense is op 1 Oktober 2010 in Abuja dood en 36 beseer op die herdenking van die land se Onafhanklikheidsdag. Okah is die volgende dag in Johannesburg in hegtenis geneem.

Okah word verbind aan die Beweging vir die Bevryding van die Niger-delta (Mend), wat veg vir 'n regverdige verspreiding van oliewinste. Die beweging het verantwoordelikheid vir die aanvalle aanvaar.

Hy is Maandag skuldig bevind op aanklag dat hy betrokke is by terroriste-bedrywighede, sameswering om aan dié aktiwiteite deel te neem en die aflewering, plasing en detonering van 'n ploftoestel.

Okah staan ook tereg op aanklagte van terrorisme wat verband hou met twee ontploffings wat in Maart 2010 in die suidelike Nigeriese stad van Warri plaasgevind het.

Suid-Afrika het om as deel van sy internasionale verpligting gevonnis, omdat Nigeriese owerhede nie om sy uitlewering aansoek gedoen het nie.

Vonnisoplegging word op 31 Januarie verwag.

– Volg Nuus24 op Twitter

- SAPA