Nieroorplanting-dokters dalk vry
2010-11-28 12:34
Durban - Die KwaZulu-Natalse dokters wat aangekla word oor hul beweerde
betrokkenheid by meer as 100 onwettige nieroorplantings kan moontlik
skotvry daarvan afkom.
Die dokters kan moontlik ’n
pleitooreenkoms met die nasionale vervolgingsgesag (NVG) aangaan. Doen
hulle dit, sal hulle ’n afwentelingsprogram moet volg, gemeenskapsdiens
moet verrig en berading moet kry.
Sodoende sal hulle nie ’n misdaadrekord kry nie en moontlik ook nie van die mediese rol geskrap word nie.
Dié moontlikheid is die afgelope week buite die Netcare-kontant-vir-niere-verhoor in die Durbanse handelshof geopper.
Die
dokters sal dan skotvry afkom van hul beweerde betrokkenheid by die
skema waardeur “ryk oorplantingstoeriste” van Israel na Durban se St.
Augustine-hospitaal gekom het om niere van arm burgers van Brasilië,
Romenië en Israel op die swartmark te koop.
Die onwettige
oorplantings is gefasiliteer deur die Israeli-dokter en orgaanmakelaar
Ilan Perry, wat die skema saam met Netcare op die been gebring het.
Die
voorgestelde afwentelingsooreenkoms word gemotiveer deur die feit dat
die vermoë van die staats- en private hospitale in KwaZulu-Natal om
wettige oorplantings te doen ernstig geraak sal word as die vier dokters
– John Robbs, Ariff Haffajee, Neil Christopher en Mahadev Naidoo –
skuldig bevind word en van die rol geskrap word.
’n Bron het aan City Press gesê die NVG se hoofdoel was om die netwerk van orgaan-oesting en -oorplanting te beëindig.
Hulle
wou ook seker maak dat Netcare, wat vroeër vandeesmaand ’n
pleitooreenkoms gesluit het en altesame R7,8 miljoen opgedok het aan
boetes en bates waarop beslag gelê is, hard en in die openbaar geslaan
word om die groep te keer om sy onwettige bedrywighede voort te sit, het
die bron gesê.
“Hulle (die dokters) is steeds leiersfigure in die mediese beroep en hul vaardighede as spesialis-chirurge is steeds nodig.”
Dr.
Sibongiseni Dhlomo, LUR vir gesondheid in KwaZulu-Natal, het egter gesê
as dit ’n uitwerking sou hê op die getal chirurge beskikbaar om
nieroorplantings te doen, sal die provinsie dit na ander provinsies
uitkontrakteer.
“Dit sou verkeerd wees om aan te voer dat iemand spesiale behandeling moet ontvang omdat hy gespe-sialiseerde vaardighede het.”
Volgens
City Press se bron bestaan die moontlikheid om die ooreenkoms te
aanvaar net tot 14 Desember, wanneer die saak weer in die hof voorkom.
Beskuldigdes
wat die staat se aanbod aanvaar, sal in die afwentelingsprogram geplaas
word, terwyl die res volgende jaar in die hooggeregshof verhoor sal
word.
Volgens die staat het Perry tussen Desember 2000 en
November 2003 109 onwettige oorplantings in die St. Augustine-hospitaal
gefasiliteer.
Nierskenkers van Israel is elk VSA$20 000 betaal en die van Romenië en Brasilië VSA$6 000.
Netcare – wat byna sewe jaar enige betrokkenheid ontken het – het sowat R21 miljoen uit die oorplantings gemaak.
- Rapport