Niemand verhewe bo die wet – Jub Jub se oom
2012-10-16 17:00
Johannesburg – Niemand is verhewe bo die wet nie, het die oom van die veroordeelde moordenaar Molemo "Jub Jub" Maarohanye Dinsdag gesê.
"Dinge lyk nie goed vir ons nie, maar wat kan mens doen?" het Simon Tsimile buite die Protea-landdroshof gevra.
Maarohanye en sy medebeskuldigde, Themba Tshabalala, is albei skuldig bevind op vier aanklagte van moord en twee van poging tot moord.
Tshabalala het die hof gevra om borgtog aan hom toe te staan hangende die vonnisoplegging. Hy het gesê: "Ek voel gebroke, omdat ek dalk nie die geleentheid gaan hê om 'n toekoms te hê en na my familie kan omsien nie."
Maarohanye het dieselfde versoek gehad, maar geen regsverteenwoordiging om ter ondersteuning van sy aansoek te argumenteer nie, omdat sy regsverteenwoordiging Dinsdag geëindig het.
Die hof het vir 'n uur verdaag, terwyl 'n regshulp-verteenwoordiger namens hom gekontak is.
Die twee mans het min emosie in die hof gewys, maar Tsimile het gesê die Maarohanye-familie het verskeie kere versoek om die families van die oorledenes te ontmoet.
"Dit is hoe ons dinge in die Afrika-kultuur doen.
"Ons wag nog om hulle te ontmoet en hulle het tot dusver geweier. Ons wil ons simpatie teenoor hulle uitspreek."
Tsimile is familie van Maarohanye se ma, wat nie een keer die twee jaar lange verhoor bygewoon het nie.
Maarohanye en Tshabalala het op 8 Maart 2010 resies gejaag in Protea-Noord toe hulle in 'n groep skoolkinders geploeg het.
Prince Mohube, Mlungisi Cwayi, Andile Mthombeni, en Phomello Masemola is dood.
Frank Mlambo en Fumani Mushwana is ernstig beseer.
Vonnisoplegging sal op 30 November plaasvind.
– Volg Nuus24 op Twitter
- SAPA
