Niemand kan ANC van regte leer – Zuma
2010-08-23 07:19
Mitchells Plain – Pres. Jacob Zuma het sy warrelwind-besoek aan die Wes-Kaap afgesluit en vir oulaas ’n dwarsklap aan die media uitgedeel.
Zuma, wat ’n groep van sowat 300 mense by die Hoërskool Glendale hier toegespreek het, het gesê die ANC veg vir almal se regte en nie net vir diegene wat deur sakebelange gedryf word nie.
“Niemand kan vir ons van regte leer nie. Ons het daarvoor geveg,” het Zuma gesê met verwysing na wydlopende ongelukkigheid oor die regerende party se plan om ’n mediatribunaal in te stel om die gedrukte media te reguleer.
“Ons het vir die regte van die media baklei en ons het dit beskerm.
“Dié besluit was nie gegrond op sakebelange nie, maar deur die belange van die mense.”
Zuma het gesê dit is belangrik dat alle mense se stemme gehoor moet word.
“Geen sektor moet ’n harder stem hê as ’n ander nie. Dit is waarom ons in debattering en konsultasie glo.”
Nasionale belang moet bo dié van sektorale belang wees.
Hy het gesê die debat met die media is bloot om seker te maak dat almal onder dieselfde “sambreel van demokrasie” is.
Sy besoek vorm deel van die ANC se program om ’n miljoen lede teen 2012 te werf en om nuwe lewe in die organisasie te blaas. Byna geen van die party se provinsiale leiers was te siene nie.
Zuma het vroeër die dag ’n diens in die Shekinah-kerk in Beacon Valley, ook in Mitchells Plain, bygewoon en daarna Colleen’s Place of Hope vir verwaarloosde en weeskinders besoek.
Volg Nuus24 op Twitter
Hier het Zuma belowe om ’n “helpende hand” uit te reik, al beteken dit hy moet R1000 per maand persoonlik bydra om die lot van dié kinders te verlig.
Marius Fransman, ANC-LP, het voor Zuma die skare toegespreek en gesê hy en Trevor Manuel, beplanningsminister in die presidensie, is ses maande gelede deur die ANC se leierskorps opdrag gegee om sewe takke in dié gebied te stig.
Tot dusver het hulle drie gestig.
Ingevolge die party se grondwet moet daar minstens 100 lede wees voor ’n tak gestig kan word.
Oor die staking deur staatsamptenare het Zuma ’n vergelyking getref met optogte tydens die bevrydingstryd.
“Selfs die tye wanneer ons betoog het, was die ANC se waardes baie duidelik. Noodsaaklike dienste soos hospitale is nie aangeraak nie. Indien ’n verpleegster of dokter verby die stakers wou kom, het ons die pad vir hulle oopgemaak.”
Hy het ook die belangrikheid van eenheid in die organisasie beklemtoon.