Nie-stakende werkers lewe in vrees

2012-09-11 15:30

Marikana – Tientalle mynwerkers wat nie staak nie, het by ‘n veilige plek bymekaar gekom nadat hulle deur stakende werkers gedreig is, het Eyewitness News berig.

Werkers van Lonmin se Marikana-myn sê hulle vrees vir hul lewens, ten spyte van die behoefte om aan hul gesinne te voorsien.

Luidens die berig is talle voorvalle van intimidasie by verskeie skagte by die Noordwes se myndistrik aangemeld.

Stakende mynwerkers wil hê hul kollegas moet aan hul staking deelneem.

Sapa het intussen berig Julius Malema het ‘n beroep op alle mynwerkers gedoen om aan ‘n landswye staking deel te neem.

Die geskorste leier van die ANC se jeugliga (ANCYL) het gesê ‘n landswye staking moet by alle myne gehou word totdat die National Union of Mineworkers (Num) se leierskap bedank.

“Daar moet ‘n landswye staking by die myne wees totdat Frans Baleni [sekretaris-generaal van die vakbond] en die Num-leierskap met onmiddellike effek uitgetree het,” het Malema aan ‘n stampvol stadion by ‘n goudmyn van Gold Fields KDC naby Carletonville gesê. Altesaam 15 000 werkers van dié myn neem deel aan ‘n staking.

Volg Nuus24 op Twitter