Nie almal byt aan Nzimande se taalplan
2011-04-07 07:22
Johannesburg - Die staat moet eerder omstandighede skep wat veeltaligheid bevorder as wat hy mense wil dwing om meer tale aan te leer.
Só het AfriForum Woensdaggereageer op dr. Blade Nzimande, minister van hoër onderwys en opleiding, se idee dat die aanleer van ’n Afrika-taal ’n voorvereiste vir die verwerwing van ’n graad moet wees.
Nzimande het Dinsdag by die bekendstelling van ’n geïntegreerde strategiese plan vir onderwyseropleiding klem gelê op die groot behoefte om meer grondslagfase-onderwysers (vir gr.1 tot gr.3) in Afrika-tale te onderrig.
Nzimande het ook gesê hy gaan spesiale aandag gee aan die ontwikkeling van Afrika-tale by universiteite.
AfriForum het dit betreur dat Nzimande Afrikaans pertinent by sy voorgestelde planne uitsluit.
Alana Bailey, adjunk-uitvoerende hoof van AfriForum, het gesê die staat is tans self die grootste vyand van meertaligheid in die land.
Sy het daarna verwys dat Suid-Afrikaanse universiteite wat meertaligheid bevorder steeds dieselfde subsidies ontvang as universiteite wat eentalige Engelse onderrig aanbied.
Prof. Wannie Carstens, voorsitter van die Afrikaanse Taalraad (ATR), het gesê hy dink die voorstel is ’n uitstekende idee, berig Annelie Maré. “Afrika-tale is vir baie jare in ’n ondergeskikte posisie geplaas, en ons behoort dit op ’n manier reg te stel.”
Op ’n vraag oor die uitsluit van Afrikaans as Afrika-taal, het hy gesê hy glo nie dit is problematies nie “Daar’s nie ’n probleem met Afrikaans nie; dit is reeds daar.”
Onder studente in Stellenbosch was reaksie op die voorstel gemeng, berig Malani Venter.
Melissa Ephraim (19), ’n tweedejaar-opvoedkundestudent, het gesê sy kan die professionele waarde van die voorstel insien.
“As jy kinders moet onderrig wie se moedertaal nie Afrikaans of Engels is nie, is dit makliker as die onderwyseres darem hul taal kan verstaan.”
Volgens Pierre Rommelaere (19), wat ’n BA-kursus in taal en kultuur volg, kan die invoer van Afrika-tale op kampusse maklik ’n politieke kleur kry.
“Taal is reeds hier ’n kwessie. Mense kan nou ras aan ’n verpligte taal haak. As jy van plan is om in Suid-Afrika te werk en byvoorbeeld regte swot, kan ’n Afrika-taal van groot hulp wees.”
Volg Nuus24 op Twitter
- Die Burger