Neusie verby met musiek as skoolvak, sê minister
2010-12-29 11:22
Pretoria - Dit lyk of dit neusie verby is met musiek as skoolvak as die departement van basiese onderwys voortgaan om eksterne musiekprogramme uit te faseer
Angie Motshekga, minister van basiese onderwys, het verlede week die regering se plan in die Staatskoerant aangekondig.
Die departement wag egter nog tot 28 Januarie op die kommentaar van belangegroepe.
Die departement beoog om alle programme wat deur Unisa, die Trinity College of London (TCL) en Associated Board of Royal Schools of Music (ABRSM) aangebied word as deel van die kurrikulum, uit te faseer.
Die rede wat daarvoor aangevoer word, is “probleme wat ondervind word met die toepassing, bestuur en administrasie” van die aanbieding van die eksterne programme.
Verskeie vereistes het in die verlede gegeld om musiek as skoolvak te kan neem. Kandidate moes byvoorbeeld in gr.10 ten minste gr.4-vlak-musiek (prakties en teorie) deurgekom het sodat hulle in gr.12 die gr.6-musiekeksamen kon aflê.
Kandidate moes ook eers ’n sekere vlak van teorie geslaag het voordat hulle die praktiese eksamen in ’n bepaalde graad kon aflê.
As die departement se planne deurgevoer word, sal musiek volgende jaar vir die laaste keer as vak in gr.10 aangebied word. Daarna sal dit in 2012 in gr.11 en in 2013 in gr.12 uitgefaseer word.
Musiekonderwysers was Dinsdag onbewus van die planne.
“Indien dit gebeur, sal dit ’n ramp wees,” het ’n onderwyser wat anoniem wil bly, gesê. “Musiekonderrig op skoolvlak is reeds sedert 1997 erg verwaarloos.
“Die groot vraag is wat die departement beoog om in die plek van die bestaande programme te bring en of dit beteken dat daar nou geheel en al met musiekopleiding weggedoen gaan word.”
- Voorleggings kan gestuur word na kriel.l@dbe.gov.za
- Die Burger