'Net Oscar het geskree' – verdediging
2013-02-20 15:20
Pretoria – Slegs die atleet Oscar Pistorius het geskree die aand toe hy sy vriendin, Reeva Steenkamp, geskiet het, het sy regsverteenwoordiger, adv. Barry Roux, Woensdag in die Pretoriase landdroshof gesê.
Getuies kon ook nie bevestig of dit Pistorius was wat gestry het, soos wat voorheen deur hulle beweer is nie.
Roux het gesê een van die inwoners wat 'n verklaring oor die gille gegee het, woon sowat 600 m van Pistorius af. Ao. Hilton Botha, ondersoekbeampte, het dié afstand later verander en gesê dit is sowat 300 m.
Botha het gesê die presiese afstand moet nog vasgestel word.
Roux het gesê Pistorius het gewoonlik aan die regterkant van die bed geslaap, "maar weens die pyn in sy skouer het hy daardie aand aan die linkerkant geslaap".
Die verdediging het ook die staat se bewering van oorsese eiendom betwis.
"Kom ons maak dit kort, hy het nie 'n huis in Italië nie," het Roux gesê.
Pistorius het wel 'n bankrekening wat hy in 2004 in Carolina oopgemaak het, maar dié rekening word nie gebruik nie.
Die ster-atleet word daarvan beskuldig dat hy Steenkamp op Valentynsdag in sy huis vermoor het.
– Volg Nuus24 op Twitter
