Nege beseer in taxi-ongeluk
2009-07-22 09:45
Durban – Een man is in ‘n kritieke toestand en twee ander persone is ernstig beseer toe ‘n taxi en ‘n motor vanoggend gebots het.
Die kop-aan-kop-ongeluk het vroeg vanoggend op die hoek van Bayhead- in Maydenstraat in Durban plaasgevind.
Verskeie passasiers was in die wrakke vasgekeer.
Brandweermanne moes ‘n man uit die motor, ‘n Mazda Midge, lossny. Hy was kritiek beseer en moes na die St. Augustine’s-hospitaal in Durban geneem word vir behandeling, het Netcare 911 gesê.
Twee ander persone het ernstige beserings opgedoen en ‘n verdere ses is ligtelik beseer.
Die beseerdes is op die toneel gestabiliseer en na die King Edward-hospitaal geneem vir verdere behandeling.