'Nee vir Zumaville, nee vir e-tol'
2012-11-16 10:22
Video - E-tolstelsel: Humeure vlam op by sitting
Humeure het opgevlam by ’n openbare sitting in Pretoria oor die e-tolstelsel. Cosatu het ‘n beroep gedoen vir ‘n dag van burgerlike ongehoorsaamheid op 30 November teen die Gautengse e-tolstelsel.
KYK
Sunninghill – Gauteng se e-tolstelsel is by die laaste openbare sitting oor die omstrede stelsel as ‘n bose geldmaak-skema beskryf.
Eyewitness News berig ontstoke motoriste het gewaarsku dat hulle die e-tolstelsel se gereedskap aan die brand gaan steek en paaie versper indien die regering met die projek voortgaan. Dié derde en finale sitting is in Sunninghill, noord van Johannesburg, gehou.
Gemoedere het weer hoog geloop toe mense die beamptes wat die vergadering gefasiliteer het, beledig het.
“Ons sê nee! Nee vir Nkandla; nee vir e-tol! Nee, nee,” het een man gesê.
“Hierdie is net ‘n geldmaak-skema; dis nie daar om paaie te herstel nie,” het ‘n ander een gesê.
Dit volg nadat Cosatu gesê het hy gaan aan die einde van die maand ‘n betoging teen die e-tolstelsel hou en die provinsie se hoofweë tot stilstand ruk.
Die Gautengse voorsitter van die vakverbond, Phutas Tseki, sê dié sittings is ‘n klug en gaan geen impak op die implementering van e-tol hê nie.
Hy het intussen ‘n beroep op die publiek gedoen om op 30 November aan die optog deel te neem.
Volg Nuus24 op Twitter
