Nasionalisering nie 'n opsie, benadruk Shabangu

2013-02-05 12:04

Kaapstad – Minerale ontwikkeling kan nie plaasvind as kapitaal nie deur die privaatsektor belê word nie, het Susan Shabangu, minister van minerale hulpbronne, Dinsdag gesê.

Sy het tydens die jaarlikse Mynbou-indaba weer die versekering gegee dat nasionalisering van myne nie die beleid van die ANC of die regering is nie.

“Die ANC se verkiesingskonferensie, wat in Desember 2012 plaasgevind het, het dit ook herbevestig: nasionalisering is nie ‘n opsie vir ons land nie,” het sy gesê.

Die ANC se besluit in hierdie verband moet sekerheid bring in die mynwese, het sy gesê.

“Ek doen ‘n beroep op julle in hierdie verband om nie te probeer om hierdie debat te laat herleef in verskillende vorme en gedaantes nie. Dit kan geskend word deur verskillende interpretasies.

“Ek wil bevestig dat ons regering ten volle bewus is van die realiteit dat minerale ontwikkeling nie kan plaasvind as kapitaal nie deur die privaatsektor belê word nie. Daar is ruimte vir beide private en openbare opbrengste, dit is inderdaad afhanklik van mekaar,” het Shabangu gesê.

– Volg Nuus24 op Twitter


 

- SAPA