Namibië, Gaboen soek SA boere
2010-09-21 09:40
Johannesburg - Namibië soek Suid-Afrikaanse besproeiingsboere om langs sowel die Oranje- as die Kunenerivier in dié land te gaan boer, terwyl Gaboen ook pas ’n voorlegging aan die landbou-organisasie Agri SA gedoen het om Suid-Afrikaanse kommersiële boere te lok.
Dr. Theo de Jager, visepresident van Agri SA en voorsitter van die organisasie se Afrika-komitee, sê in Agri SA se jongste nuusbrief 22 lande het nou al dié organisasie se hulp gevra om landbouproduksie op dreef te kry.
Volgens hom is daar reeds meer as 800 Suid-Afrikaanse boere in Mosambiek, meer as 300 in Botswana en meer as 20 in Malawi, Zambië en Kenia.
Vyf Suid-Afrikaanse boere het reeds met die Libiese departement van landbou geskakel oor landbou-geleenthede in dié olieryke land.
De Jager sê kontrakte met die regering van die Demokratiese Republiek van die Kongo (DRK) behoort eersdaags gefinaliseer te wees.
Hy sê Agri SA hoop om dit vir sy lede veilig te maak om hul boerderybelange elders in Afrika uit te brei.
Johan Pienaar, adjunk-uitvoerende direkteur van Agri SA, sê dit is vir dié organisasie belangrik dat die maksimum beleggingsbeskerming in die lande aanwesig is en dat dit formeel beslag kry in bilaterale ooreenkomste tussen ’n betrokke land en Suid-Afrika.
Sulke ooreenkomste moet ook voorsiening maak vir aspekte soos die gebruiksregte van grond, belastingkwessies en die algemene regte van die boere.
Agri SA sê sy Afrika-komitee het die laaste paar maande “verskeie plaaslike en buitelandse finansieringsbronne geraadpleeg om landboufinansiering vir boere, wat na Afrika-lande wil uitbrei, te ontgin”.
André Botha, president van Agri Gauteng en ’n lid van die komitee, sê dié organisasie onderhandel om ’n sogenaamde “regering-tot-boer-kontrak” met die DRK se minister van landbou daar te stel.
“Hierdie kontrak sal meer spesifiek tot aktiwiteite op individuele plase wees, die vasstel van die plaas se grense, voorwaardes vir boerdery-aktiwiteite en sal die memorandum van verstandhouding tussen Agri SA en die DRK versterk.”