Najwa weer in hof oor bedrog
2010-03-12 06:25
Vania van der Heever, Die Burger
Kaapstad-Die veroordeelde moordenaar Najwa Petersen het Donderdag die beskuldigdebank in die Wynbergse landdroshof op ’n aanklag van bedrog met rooi lipstiffie, maar sonder ’n kopdoek betree.
Terwyl sy gewag het vir haar beurt om voor die landdros te staan, moes sy in die openbare galery met haar denim-uitrusting tussen bewaarders sit.
Petersen, wat haar man, die kunstenaar Taliep Petersen, vermoor het, staan nou tereg op aanklag van bedrog. Sy dien haar vonnis in die Worcester-gevangenis vir vroue uit.
Haar hofverskyning gister hou verband met versekeringseise ter waarde van R67 000 wat sy na bewering ná haar man se dood by die South African Eagles-versekeringsmaatskappy (ook bekend as Zürich SA) ingedien het. Sy het glo eise ingedien vir goedere soos selfone, digitale kameras, juweliersware, horlosies en geld wat na bewering ten tyde van die moord op haar man gesteel is. Petersen het R35 000 van die versekeringsmaatskappy ontvang.
Gedurende haar moordverhoor en vonnis het die versekeringsmaatskappy tot die slotsom gekom dat Petersen moontlik bedrog gepleeg het en ’n klag teen haar ingedien.
Charlean Olivier, vir die staat, het gesê die ondersoek is voltooi, maar die staat versoek uitstel.
Landdros Heather Paulse het die saak tot 21 April uitgestel.
- Die Burger