Najwa se broer gestraf oor kreef in sy besit
2010-09-04 12:51
Die Burger
Kaapstad. – Whaleed Dirk (34), jonger broer van die veroordeelde moordenaar Najwa Petersen, is Vrydag ’n boete van R20 000 of 18 maande tronkstraf, waarvan die helfte vir vier jaar opgeskort is, in die Piketberg-landdroshof opgelê.
Dieselfde straf is aan Abraham Lesch opgelê nadat hulle skuld beken het.
Dirk, Lesch en vyf ander mans het in die hof verskyn op aanklagte van die besit van kreef tydens ’n geslote seisoen, die besit van kreef en lynvis sonder ’n faktuur, die besit van ondermaatkreef, die besit van eierdraende kreef en die besit van kreef wat nie in ’n heel toestand is nie.
Landdros P.A. Grundlingh het Dirk en Lesch elk ’n boete van R20 000 of 18 maande tronkstraf, waarvan die helfte vir vier jaar opgeskort is, opgelê.
Dirk en Lesch het elk ’n boete van R10 000 betaal.
Die mans is op 16 Augustus in Redelinghuys in hegtenis geneem nadat die polisie hulle ná ’n kort jaagtog deur die dorpie in hegtenis geneem het.
Die polisie het altesaam 299 kreefsterte, 358 ondermaat-krewe, 284 maatkrewe en 16 lynvisse in hul besit gevind.
Die saak teen die ander vyf – Abdullah Hendricks (44, van Kaapstad), Victor Latola (32), Patrick Latola (23), Willem Stevens (30), en Herald Morny (58), almal van Elandsbaai – is teruggetrek.
- Die Burger