Naidoo ‘wil sy aandeel beken’
2011-11-08 07:05
Durban – In ’n dag van dramatiese wendings in die verhoor oor die grusame moord op Johnnie Lotter en sy vrou, Riekie, het hul dogter se destydse verloofde sy pleit na skuldig verander en toe teruggekrabbel.
“Edelagbare, ek wil nie die hof se tyd mors nie, maar ek weet nie meer watter kant toe nie,” het Mathew Naidoo (25) gistermiddag aan regter Shyam Gayanda in die hooggeregshof hier gesê toe dit, nadat hy sy pleit verander het, blyk dat hy tóg nie ’n aandeel in die moorde op die Lotter-egpaar erken nie.
Hy staan saam met twee van die egpaar se kinders, Hardus (23) en Nicolette Lotter (29), tereg. Hulle voer aan Naidoo het gesê hy is die seun van God en dat dit God se wil is dat hulle hul ouers vermoor.
Adv. Roland Parsotham, namens Hardus, het gisteroggend op Naidoo se derde dag in die getuiebank aan hom gesê hy sukkel om baie dinge te verklaar “omdat jy in jou eie web van leuens vasgevang is”.
Hy het herhaaldelik uit Johannes 8:32 aangehaal en vir Naidoo gesê “die waarheid sal (jou) vry maak”.
Dít was onder meer nadat Naidoo nie kon verklaar waarom hy in Junie 2007 – 11 maande voor die moorde – aan Nicolette Lotter geskryf het dat haar pa binnekort ’n onnatuurlike dood sou sterf nie.
Tydens kruisondervraging het Naidoo in ’n stadium gesê: “Dit lyk seker of ek ’n totale gek van myself maak.”
’n Rukkie later het hy eers vir die regter gevra of hy vir sielkundige waarneming verwys kan word en daarna of hy met sy regsverteenwoordiger, adv. Vijay Sivakumoor, kan beraadslaag.
Naidoo is toegelaat om in die teenwoordigheid van al die regsverteenwoordigers tydens ’n verdaging met Sivakumoor te praat waarna ooreengekom is dat hy met ’n onafhanklike advokaat oor die middagete kon praat.
Dit was ná middagete dat Naidoo in die getuiebank gesê het hy “is betrokke by dié grusame misdaad” en dat hy sy aandeel “heeltemal wil beken”.
Toe Gayanda hom later egter oor sy pleit uitvra, het Naidoo ontken dat hy by die moorde betrokke was, maar dat hy wel gehelp het om dit te probeer verdoesel.
“Ek wil net hê dit moet oor wees sodat die Lotter- en Naidoo-families kan voortgaan met hul lewe,” het hy gesê.
As gevolg van sy bekentenis van medepligtigheid het Gayanda gesê die gevaar bestaan nou dat Naidoo kan probeer vlug.
Ondanks Naidoo se emosionele pleidooi het Gayanda sy borgtog van R20 000 opgeskort en gelas dat hy in die Westville-gevangenis aangehou word.
Die verhoor duur voort.
– Volg Nuus24 op Twitter.
- Beeld