Nagwaak vir Malema in Limpopo gehou

2012-11-29 16:08

Johannesburg – Die ANC-jeugliga in Limpopo gaan Donderdagaand 'n nagwaak hou vir sy voormalige leier, Julius Malema.

Die nagwaak sal na verwagting om 21:00 in Polokwane begin voor Malema Vrydag in die hof verskyn, het Nono Mabunda, provinsiale woordvoerder van die jeugliga, gesê.

Hy het gesê die provinsie sal Malema ondersteun, soos wat hy maande gelede belowe het.

Ronald Lamola, waarnemende president van die ANCYL, het Maandag gesê die liga gaan nie saamtrekke hou om Malema se hofverskyning te ondersteun nie.

Mabunda het egter gesê die jeugliga in Limpopo verwag ondersteuners uit alle substreke wat die nagwaak sal bywoon.

Ná die nagwaak sal ondersteuners na verwagting buite die Polokwane-landdroshof betoog.

Malema staan tereg op aanklagte van geldwassery. Vier van sy mede-beskuldigdes staan tereg op aanklagte van bedrog, korrupsie en geldwassery in verband met ‘n tender van R52 miljoen wat aan hulle toegeken is.

– Volg Nuus24 op Twitter

- SAPA