Nagmaalwyn, hondepille laat vrou 100 jaar haal
2011-02-18 09:12
Kaapstad - Géén drank nie, behalwe vir ’n lipnatmakertjie tydens Nagmaal – en Bob Martin-hondepille.
Dít is die suksesresep van Alida Lewis van Kleinvlei in Blue Downs, wat Donderdag ’n honderd lewensjare saam met vriende en familie gevier het.
“Jy moet jouself oppas, en só het ek gemaak. Ek het nooit in my lewe alkohol ingeneem nie, net ’n kelkie Nagmaalwyn in die kerk,” het sy verduidelik.
En wat van medisyne en voorskrifpille? Watwou! Geen medikasie vir haar nie, behalwe Bob Martins-hondepille.
“Toe ek die pille gekoop het, het die man gevra hoe oud my hond is. Toe sê ek nee, dis vir my!”
Sy het gesê dié pille het haar heeltemal van jig genees. “Ek kan nou weer skottelgoed was, hekel én brei.”
Vriende en familie het gister omtrent om Lewis gekloek. En ’n baie spesiale gas het ook kom inloer.
Patricia de Lille, provinsiale minister van maatskaplike ontwikkeling, het ook gister verjaar en het dit saam met Lewis gevier.
“Ek wil graag ook by die honderdjaar-merk uitkom en het by Alida kom hoor hoe om dit te doen,” het sy gesê.
De Lille het gister 60 geword.
Lewis was vinnig by met ’n antwoord vir die minister.
Sy het gesê die Here was haar genadig en het haar gespaar omdat sy ’n skoon lewe gelei het.
“Eer jou vader en jou moeder dat jou dae verleng kan word en vertrou op die Here.
“My bure, die Claassens en Fortuine, het reeds vir my kom geluk sê en mense is heeldag hier in en uit,” het sy gesê.
Lewis, wat haar lewe lank as huishoudster gewerk het, is in 1911 in Laingsburg gebore en het op 11-jarige ouderdom na die Kaap verhuis.
Sy het nege kinders, 70 kleinkinders, 48 agterkleinkinders en 37 agter-agterkleinkinders.
Sy is reeds sedert die 1970’s lid van die Afrika Metodiste Episkopale-kerk in Kleinvlei en gaan vanaand ’n erediens wat spesiaal vir haar gereël is in dié kerk bywoon.
Volg Nuus24 op Twitter
- Die Burger