NVG ondersoek voormalige president van Madagaskar
2012-08-05 11:41
Johannesburg – Die nasionale vervolgingsgesag ondersoek die voormalige president van Magagaskar, Marc Ravalomanana, vir vermeende misdade teen die mensdom, het ‘n berig Sondag gesê.
Die NVG het Saterdag bevestig dat inligting wat hy aanvanklik ontvang het, dui op “redelike bewyse” dat misdade teen die mensdom glo plaasgevind het, het die Sunday Times berig.
Ravalomanana het in 2009 na Suid-Afrika gevlug ná weke se spanning in Madagaskar wat vererger is toe sy wagte op vreedsame betogers losgebrand en sowat 40 doodgeskiet het.
“Ek kan bevestig dat die proses van die insameling van bewyse onderweg is en gesprekke is met die direktoraat vir prioriteitsmisdade gehou.”
Dit volg nadat ‘n Malgassiese groep, genaamd die Association of Martyrs of Antananarivo Merina Square, vier maande gelede ‘n klag gelê het by die Suid-Afrikaanse aanklaer.
Die vereniging het ‘n dossier, insluitende beëdigde verklarings deur vermeende slagoffers, video-beeldmateriaal en internasionale verslae oor wat in Madagaskar gebeur het voordat Ravalomanana ontsetel is, ingedien.
Makeke sê die finale besluit oor vervolging berus by die nasionale direkteur van openbare vervolgings.
– Volg Nuus24 op Twitter
- SAPA
