NVG benodig jaarliks nóg R250 milj.

2012-04-18 07:05

Johannesburg – Die Nasionale Vervolgingsgesag (NVG) sê hy kort 'n bykomende R250 miljoen per jaar om vakante poste te vul en sy teikens te haal.

Willie Hofmeyr, adjunkdirekteur van openbare vervolgings, sê die NVG het ambisieuse teikens gestel en indien hulle dit wil bereik, sal hulle meer mense nodig hê, het RSG berig.

Hofmeyr het die parlement se Portefeuljekomitee oor Justisie oor die NVG se strategiese plan ingelig.

Hy het 'n beroep op die komitee gedoen om namens die NVG in te gryp deur die Tesourie te oortuig dat die liggaam deur 'n krisis bedreig word.

Nomgcobo Jiba, waarnemende hoof van die NVG, het intussen gesê dit lyk of 'n versoek aan die departement van finansies vir meer geld op dowe ore geval het.

Sy sê ondanks 'n vakaturekoers van 12 %, het die NVG besef dat sy grootste struikelblok die omstrede herstrukturering deur die nasionale direkteur van Openbare Vervolgings, Menzi Simelane, is, het die radiostasie berig.

Simelane is op spesiale verlof hangende die hersiening van die appèlhof-uitspraak wat sy aanstelling omgekeer het.

Volg Nuus24 op Twitter