NVG: Media was nie verkeerd om Kotzé te identifiseer
2012-01-13 20:16
Kaapstad - Die Nasionale Vervolgingsgesag sê mediahuise wat die verdagte in die Modimolle-saak, Johan Kotzé, se naam genoem en besonderhede oor hom gepubliseer het, het nie verkeerd opgetree nie.
'n Woordvoerder van die NVG, Mthunzi Mhaga, sê die media se identifikasie van die man het geensins die vervolgingsproses onder verdenking geplaas nie.
Hy sê Kotzé was 'n voortvlugtige en die media het daartoe bygedra dat hy herken en in hegtenis geneem is.
Kotzé word onder meer van moord, verkragting, sameswering tot verkragting en aanranding aangekla.
Ingevolge die Strafproseswet mag 'n verdagte wat van onsedelikheid of afdreiging aangekla word, nie geïdentifiseer word voordat hy in die hof verskyn en gepleit het nie.
Kenners meen die spesifieke omstandighede rondom Kotzé het dit aanvaarbaar gemaak om hom te identifiseer. Hulle maan egter dat die media steeds versigtig moet wees en deurgaans na hom as 'n verdagte moet verwys.
– RSG
– Volg Nuus24 op Twitter