NUM veroordeel aanval op voorsitter

2012-09-30 23:04

Johannesburg – Die National Union of Mineworkers (NUM) het Sondag se aanval op sy voorsitter van die Anglo Platinum Khomanani-tak veroordeel.

"Die NUM veroordeel die aanval en die dreigemente en intimidering op sy lede," het Lesiba Seshoka, woordvoerder, in 'n verklaring gesê.

Volgens Seshoka is ‘n petrolbom glo Vrydagaand na die voorsitter se huis gegooi.

Sy naam mag nie bekend gemaak word voordat sy familie van die voorval in kennis gestel is nie.

Seshoka sê hy het verneem dat 'n sogenaamde moordbende moontlik in die Rustenburggebied bedrywig is, het RSG berig.

Hy het gevra dat wetstoepassingsagentskappe alles montlik moet doen om die platinum-gebied in Noordwes te beveilig omdat talle vakbond-vloerleiers die afgelope tyd aangeval is.

Intussen beplan stakende mynwerkers regoor die land om 'n massa-optog na die Uniegebou in Pretoria te hou.

Die woordvoerder van die stakers, Mametlwe Sebei, sê die optog is daarop gemik om druk op die mynbedryf te plaas om sy werkers behoorlike salarisse te betaal en om hul lewensomstandighede te verbeter.

Die optog word vir 13 Oktober beplan.

– Volg Nuus24 op Twitter.

- SAPA