NG dominee sê hy toor nie, hy bid
2011-01-18 07:30
Johannesburg – ’n NG dominee het Maandag verbaas gereageer toe ’n joernalis van die Kerkbode hom ’n wit sangoma genoem het.
Ds. Pieter Fourie van die gemeente Rant-en-Dal in Krugersdorp wou weet of Jean Oosthuizen dan nie verstaan wat hy doen nie.
Hy is nie besig met toordery nie. Hy bid vir mense.
Oosthuizen het gister in ’n nota onder die opskrif “Dominee of sangoma” gereageer op die manier waarop Fourie homself op sy Facebook-blad bekend stel, naamlik “Vra dominee Pieter”.
Fourie nooi oud en jonk daarop uit om hom met enige probleme te kontak en skryf onder meer: “Dink jy dalk iemand het jou familie getoor of vervloek? Spook dit in jou huis? Bel my of los ’n boodskap.”
Oosthuizen skryf dit klink soos die uitnodiging van die een of ander bossiedokter of sangoma, maar dis eintlik ’n NG dominee.
“Blaas my siel! Dan word mense soos Julian Müller, Sakkie Spangenberg en dies meer dwaalleraars genoem.
“Wat noem ’n mens dan ’n knaap soos dié? Die man preek die wit waks uit algar op Facebook en fokus sy bediening op jong mense.
“Is dit verantwoordelik om ’n wit sangoma soos dié onder jong mense los te laat?”
Fourie sê hy help mense, hy toor hulle nie. Hy bid vir hulle. Daar is ’n groot verskil tussen hoe hy werk en hoe ’n sangoma dit doen.
Hy help graag kinders wat sê hulle sien demone en geeste deur vir hulle te bid. Daar is gewis mense wat sê hulle sien spoke of demone.
Dit gebeur as hulle na sekere flieks gekyk het of glasie-glasie gespeel het. As mense kla dit spook, vra hy hulle watter sondes hulle gedoen het. Dalk het iemand daar selfmoord gepleeg.
Dan voel die demoniese magte hulle het ’n reg om daar te wees.
Die meeste kere dat hy help, is as kinders nie kan slaap nie.
Dalk is daar ’n Boeddha-beeld of Afrika-masker in die huis. Dan moet hulle die huis skoonmaak.
Ds. Jannie Pelser, Fourie se kollega, sê die bediening van bevryding is nie deel van Fourie se pligtestaat van die gemeente nie.
Hy doen dit in sy eie tyd.
Volg Beeld op Twitter
- Beeld