N1 steeds gesluit ná grusame ongeluk
2010-03-11 08:26
Johannesburg – Die N1-suid in Pretoria was Donderdagoggend steeds vir motoriste gesluit om veiligheidsredes, het die Tshwane-munisipaliteit gesê.
“Die N1-suid is gesluit as gevolg van die afbreking van die hyskraan by Atterburystraat,” het woordvoerder Console Tleane gesê.
“Daar is besluit dat dit nie veilig is om die pad oop te maak terwyl die afbreking plaasvind nie.”
Verkeer van die N4-wes sal omlei word na die middestad en sal nie op die N1-suid toegelaat word nie.
Die Atterbury-brug is ook gesluit vir verkeer.
“Die brug is nie meer veilig nie. Motoriste word aanbeveel om alternatiewe paaie te gebruik.”
Motoriste moet sowat 45 minute tot ‘n uur ekstra by hul tyd op die pad reken.
Dit volg nadat ‘n vragmotor wat ysterpale vervoer het Woensdagmiddag omstreeks 17:00 in ‘n sementvragmotor en drie ander voertuie vasgery het, voordat dit in ‘n hyskraan ingeploeg het.
Een man se lyk was onder een van die vragmotors vasgekeer en drie mense is in die ongeluk beseer.
“Ingenieurs het deur die nag gewerk om die hyskraan te stabiliseer om te verhoed dat dit inmekaarstort,” het Tleane gesê.
“Daar is gevind dat dit sowat ‘n meter geskuif het. ‘n Besluit is gemaak dat die beste opsie is om dit uitmekaar te haal en dan weer aanmekaar te sit sodat motoriste nie in gevaar is nie.
Gevolglik gaan deel van die brug wat gebrand het afgebreek en oorgebou word, het Tleane bygevoeg.
“Ons kan nie sê hoe lank hierdie proses gaan neem nie.”
- Sapa