Mynwerkers veroordeel ontplooiing van weermag
2012-09-16 07:35
Kaapstad – Die woordvoerder van die stakende mynwerkers, Mmametlwe Sebei, het die ontplooiing van die weermag en polisie by Wonderkop in die Noordwes veroordeel, het die SABC berig.
Die weermag is by die informele nedersettings van Nkaneng en Marikana ontplooi om bystand aan die polisie te verleen.
Die polisie het Saterdag rubberkoeëls gebruik om te verhoed dat mynwerkers by die heuwel bymekaarkom waar 34 van hul kollegas doodgeskiet is.
Die vakbond Amcu het intussen gesê mynwerkers se regte is geskend nadat die polisie vroeg Saterdagoggend klopjagte op hul wonings in die gebied uitgevoer het, het RSG berig.
Volgens die polisie was dit noodsaaklik om kalmte in die gebied te herstel.
Joseph Mathunjwa, president van Amcu, sê die polisie moes lasbriewe hê en dat werkers se privaatheid geskend is.
Thulani Ngubane, ‘n polisiewoordvoerder, het aan AFP gesê sowat 500 polisiebeamptes het aan die klopjagte deelgeneem.
Polisiebeamptes het op ‘n groot aantal knopkerries, pangas en ander gevaarlike wapens beslag gelê.
Dit kom ook nadat die regering vroeër aangekondig het dat hy “onwettige saamtrekke” nie sal duld nie en dat stakers se wapens van hulle weggeneem sal word.
– Volg Nuus24 op Twitter.
