Mynwerkers spreek misnoeë met Zuma uit

2012-08-30 15:25

Johannesburg – Julius Malema, geskorste leier van die ANC se jeugliga (ANCYL), is toegejuig toe hy by die Aurora-myn in Grootvlei, Springs, opgedaag het.

Malema het in ‘n Mercedes-Benz Viano-minibus in ‘n wit hemp, swart broek en sy kenmerkende baret opgedaag.

Werkers by die myn het Malema vertel hoe pres. Jacob Zuma belowe het om hulle te help, maar nooit sy beloftes nagekom het nie.

“Zuma was hier... het betaalstrokies gevat en belowe om aandag aan ons probleme te gee. Daarna het hy verdwyn en toe sy kinders gebring om die myn te bestuur,” het een van die werkers gesê.

Aurora se direkteurs sluit Zuma se neef Khulubuse Zuma en oudpres. Nelson Mandela se kleinkind Zondwa Mandela in.

Werkers het ook vertel hoe die likwidateurs van Aurora se bemagtigingstelsel hul verblyf gesloop het en hulle op die straat gelos het.

Aurora se direkteure word daarvan beskuldig dat hulle die myn se bates gestroop het en nie werkers se salarisse betaal het nie. ‘n Ondersoek is van stapel gestuur.

Volg Nuus24 op Twitter