Mynwerker vas wat R800 000 se platinum steel

2012-12-30 14:00

Johannesburg – ‘n Sewe-en-dertigjarige mynwerker by Lonmin se Marikana-myn is in hegtenis geneem nadat hy in besit was van rou platinumpoeier ter waarde van R800 000, het die polisie in die Noordwes Sondag gesê.

Kapt. Amanda Funani sê die man is Saterdag by ‘n padblokkade in Marikana in hegtenis geneem.

“Volgens bewerings is die verdagte met rou platinumpoeier ter waarde van R800 000 in sy besit gevind. Die verdagte se motor is deur die polisie voorgekeer en toe dit deursoek word, is die waardevolle metaal gevind. Die verdagte is in hegtenis geneem.”

Sy sê die man het ontken dat die poeier platinum was, maar ‘n inspekteur by Lonmin-myne het bevestig dat dit was.

“Nadat dit bevestig is, is die verdagte in hegtenis geneem. Hy sal Maandag in die Rustenburg-landdroshof verskyn,” het sy gesê.

– Volg Nuus24 op Twitter

 

- SAPA