Mynwerker kritiek ná geweld by Amplats
2013-02-19 09:09
Johannesburg – 'n Mynwerker is in 'n kritieke toestand ná arbeidsonrus by die Anglo American Platinum-myn in Rustenburg in die Noordwes, het die polisie Dinsdag gesê.
"Op die oomblik is daar een persoon wat kritiek beseer is," het brig. Thulani Ngubane gesê.
Ngubane het berigte ontken dat 'n mynwerker gesterf het in Maandag se geveg tussen sekuriteitswagte en werkers. Verskeie mense is in die gevegte beseer.
"Die persoon is met 'n stomp voorwerp geslaan."
Ngubane het gesê 13 mense by die Siphumelele-skag is beseer.
"Sommige van die mense is met pangas en skerp voorwerpe gekap, terwyl sekuriteitswagte met rubberkoeëls losgebrand het op die ander.
"'n Groep van sowat 1 000 mense het vier mense by die vakbondkantore aangeval. Sekuriteitswagte by die myn het ingegryp en rubberkoeëls op die oproerige mense geskiet. Altesaam 13 mynwerkers, waaronder vier sekuriteitswagte, is beseer."
Gaddafhi Mdoda, leier van die werkers, het gesê werkers van alle skagte het nie Dinsdag by die werk opgedaag nie. Die werkers sal by die Bleskop-stadion vergader.
"Ons wil wegdoen met Anglo-bestuur. Inligting sal by die vergadering bekend gemaak word."
Amplats het verlede jaar 12 000 stakende werkers in Rustenburg in die pad gesteek, maar die werkers is later weer aangestel.
– Volg Nuus24 op Twitter
- SAPA
