‘Mynwater gaan nié sakekern oorstroom’
2011-06-28 06:58
Suur mynwater gaan nié die diep kelders van wolkekrabbers in Johannesburg oorstroom nie, lui ’n verslag wat gister uitgereik is.
“Die studie is pas afgehandel en die slotsom was dat daar geen risiko bestaan dat mynwater enige kelderstruktuur in die sentrale sakekern van Johannesburg sal oorstroom nie,” het die Mynwater-navorsingsgroep, onder leiding van prof. Frank Winde, in ’n verklaring gesê.
Die groep is by die Noordwes-Universiteit se Potchefstroom-kampus gebaseer. Hul geo-tegniese risikobepalingstudie is hoogs krities oor die suurmynwater-dreineringsverslag wat verlede jaar deur ’n span spesialis-wetenskaplikes vir die regering voorberei is en aan ’n interministeriële komitee voorgelê is.
Dié verslag waarsku onder meer dat die stygende watervlak ondergrondse infrastruktuur naby stedelike gebiede kan oorstroom. Wilde se navorsingsgroep het gesê dit lyk asof dié verslag die moontlike risiko’s “opgeblaas, wanvoorgestel en oordryf het”.
Die Wilde-groep het bereken dat die mynwatertafel in die Sentrale Kom tot ’n maksimum van 90 m onder die basis van Absa se Oostelike Toring, die diepste van die bankgeboue in die stad wat ondersoek is, sal styg.
Die veiligheidsmarge vir die nuwe administratiewe gebou van Standard Bank, wat na berig word reeds oorstroom word, is 106 m, is bevind.
Die twee bankgroepe het die studie aangevra.
Die verslag verskil ook in ander wesenlike aspekte van die regeringsverslag, lui die verklaring.
Dit sluit in dat die watertafel stadiger sal styg, dat baie minder water bo die oppervlak sal uitvloei en dat onbehandelde water wat in strome beland ’n baie minder ernstige impak op die watergehalte van strome sal hê.
Die navorsers het om ’n meer volhoubare, goedkoper, lae-energie-oplossing vir die probleem gevra, “teenoor die huidige voorgestelde hoë-koste-, hoë-energie-pomp-en-behandelingstrategie wat waarskynlik onbepaald deur die gemeenskap gesubsidieer sal moet word”. Die regering het reeds R400 miljoen geoormerk om pompstasies en behandelingsaanlegte te bou.
Volgens die studie sal die water wat bo die oppervlak uitkom, gebruik kan word. “Onbehandelde suur mynwater is in die verlede deur munisipale rioolwerke aan die Sentraal-Rand gebruik om nitraat-vertering aan te help.”
In ag genome die baie rioolwerke in die omgewing kan die meeste, indien nie al die suur mynwater wat bo die oppervlak uitkom nie, so gebruik word, wat sal beteken daar is geen behandelingskoste nie en skoon water kan vir ander doeleindes aangewend word, is bevind.
– Beeld
– Volg Nuus24 op Twitter.
- SAPA