Mynwater gaan SA suur bekom
2010-11-24 06:27
Volksblad
Johannesburg – Die Suid-Afrikaanse belastingbetaler sal “vir die res van sy bestaan” die las van die “winsgewende” goudmynbedryf van die verlede moet dra, lui ’n nuwe verslag.
Dit beteken die belastingbetalers van Suid-Afrika sal aanvanklik R3,4miljard moet opdok vir die bou van ’n aanleg om 120 jaar se suur mynwater aan die Witwatersrand op te vang. Nóg R650 miljoen per jaar is nodig om die water dan na ’n sentrale punt te pomp en tot ’n “aanvaarbare vlak” te behandel voordat dit in die natuur vrygelaat word.
Die verslag, Integrated water quality management plan for the Vaal River System, is opgestel deur die departement van waterwese saam met onder meer Eskom, Sasol, Randwater, AgriSA, die departement van landbou en die Kamer van Mynwese.
Dr. Koos Pretorius, direkteur van die Federasie vir ’n Volhoubare Omgewing, het Dinsdag gesê “dit is ’n skande” dat die regering van die Suid-Afrikaanse belastingbetaler verwag om vir die nalatenskap van die uitgewerkte goudmynbedryf te betaal.
In die verslag ondersoek die staat die koste van die skoonmaak van die mynwater en die sogenaamde verdunning van die besoedelde water in die Vaalrivier-Barrage deur onder meer “gereeld” water uit die Vaaldam (stroomop van die Barrage) vry te laat.
Volgens Mariette Liefferink, ook ’n direkteur van die FSE, is dit duidelik Gauteng gaan teen 2015 ’n ernstige watertekort ervaar deurdat drinkwater gebruik gaan word om die water in die res van die Vaalrivier te verdun.
Die verslag lui dat die suur mynwater wat in die Vaalrivier-Barrage beland, die stelsel só laat versout dat dit binne die volgende vier tot vyf jaar onbruikbaar sal wees. As “niks” gedoen word nie, kan dit die ekonomie, sowel as die miljoene mense wat stroomaf van die Vaaldam van die Vaalrivier se water afhanklik is, ernstig benadeel.
Onder meer word na die suiwering van die mynwater gekyk as sogenaamde bron wat die watertekort in die Vaalrivier-Barrage kan “aanvul”.
Die plan is om die tekorte in die Vaaldam met ’n tweede dam uit Lesotho aan te vul, lui die verslag.
Pretorius het gesê dit is duidelik die opstellers het nie die invloed van die sowat 15 steenkoolmyne in die opvangsgebied van die Vaalrivier voor die Vaaldam in ag geneem toe hulle dié verslag opgestel het nie en ook nie dié wat eersdaags hier wil begin myn nie.
Dié myne besoedel reeds die Vaaldam.
Marius Keet, adjunk-direkteur van watergehaltebestuur by die departement, het gesê ’n oplossing móét vir die suurmynwater-probleem gevind word.
Volgens Pretorius lui die Grondwet “die besoedelaar moet betaal” en moet die regering lankal aan die myne gesê het: “Ruim jul gemors op.”
Volg Nuus24 op Twitter
- Volksblad