Mynplanne bedreig vakansiedorp

2012-07-29 11:30

Johannesburg – Die toerisme-bedryf in 'n kusdorp in KwaZulu-Natal word bedreig nadat 'n mynlisensie aan 'n internasionale maatskappy toegeken is, berig die Sunday Times.

Sowat 2 800 hektaar bosbou en landbougrond buite Mtunzini sal deur die myn geraak word.

Die plaaslike mynmaatskappy Exxaro het 'n gesamentlike onderneming met die Australiese maatskappy New Tronox aangegaan vir die ontwikkeling van die Fairbreeze-myn. Dié projek beloop R2,4 miljard.

Inwoners van Mtunzini beplan om teen die provinsiale departement van omgewingsake se besluit om 'n mynlisensie toe te ken, te appelleer.

Barbara Chedzey, voorsitter van 'n komitee wat die inwoners verteenwoordig, het gesê sy is "gegewe die politieke druk om werksgeleenthede te skep", nie verbaas deur die departement se besluit nie.

Eko-toerisme is die dorp se hoofbron van inkomste.

Trevor Arran, woordvoerder van New Tronox, het gesê die nodige regs- en reguleringsprosesse is gevolg in die goedkeuring van die Fairbreeze-myn.
      
– Volg Nuus24 op Twitter

- SAPA