Myngroep teiken wynlande
2010-02-19 08:00
Jorisna Bonthuys
Kaapstad - Die mynbedryf het die hart van die Bolandse wynstreek en dele van die Kaapstad-metropool in die visier.
Wynboere en grondeienaars is omgekrap oor prospekteerreg-aansoeke wat in die Bottelary-gebied naby Stellenbosch asook aan die voet van die Tygerberg deur ’n staatsbeheerde mynboumaatskappy gebring is.
African Exploration Mining and Finance Corporation (AEMFC) (Bpk.) wil ontginningsregte bekom in onder meer die Bottelaryheuwels-Renostersveld-bewarea, ’n deel van die Jordan-wynlandgoed en die historiese De Grendel-landgoed.
Aansoeke hiervoor is ingevolge die Wet op die Ontwikkeling van Minerale en Petroleum-hulpbronne by die departement van mineralehulpbronne ingedien. Die publiek kan tot 9 Maart reageer. Die mynboumaatskappy moet nou ’n omgewingsbestuursplan indien.
Die gebied by Stellenbosch waarvoor aansoek gedoen word, strek oor 4 700 ha en sluit in die plase Anneks Langverwacht 245, Haasendal 222 en die oorblywende gedeelte van Rosendal 249 Die maatskappy wil prospekteerregte bekom vir onder meer tin-, sink-, koper-, mangaan- en silwererts.
Die aansoek om prospekteerregte in die metropool sluit in Highlands 195, Hooggelegen 193, Hooggelegen 194, De Grendel 256 en De Grendel 255. Die maatskappy wil op dié eiendomme na tin-, lood-, sink-, koper-, mangaan-, silwer- en litiumerts soek.
Tielman Roos van die Mooiplaas-wynlandgoed en -natuurreservaat in Bottelary het gesê hy het eers Sondag van dié planne gehoor. Die gebied grens aan sy eiendom. Roos, voorsitter van die Bottelary-bewarea, het gesê hy is uit ’n ekologiese én toerisme-oogpunt besorg oor die aansoek. Die bewarea, waaraan verskeie grondeienaars deel het, huisves van die laaste oorblywende stukke graniet-renosterveld – ’n hoogs bedreigde planttipe.
Die beoogde eksplorasie-bedrywighede is in ’n gevestigde landboustreek en boonop in die buffergebied van die Kaapse Wynland-biosfeerreservaat.
Van die eksplorasiegebiede is teen die luukse residensiële gebiede Zevenwacht Country Estate, Zevenwacht Village en Klein Zevenwacht.
Gary Jordan van Jordan-wynlandgoed, wat tot Dinsdag onbewus was van dié planne, het gesê ’n groot deel van sy plaas is in die beoogde prospekteergebied. Hy gaan beslis protes aanteken. “As hier ’n myn moet kom, sal ek my kelder moet toemaak. Wat word van die 84 mense wat vir my werk en hul gesinne?”
Ook adv. Martin Coetzee, regsverteenwoordiger van die landgoed De Grendel, het aangedui dié aansoek sal teengestaan word. Omdat Haasendal 222 aan ’n residensiële gebied grens, moes AEMFC aanvullende dokumentasie met redes vir sy aansoek hier indien.
- Die Burger