Myne in die kollig by ANC-vergadering

2012-09-14 21:42

Pretoria – 'n Vergadering van die ANC se Nasionale Uitvoerende Komitee sal op verskeie dringende sake fokus, insluitend die situasie by platinum-myne, het die party se sekretaris-generaal, Gwede Mantashe, gesê.

“Ons gaan aandag aan die Marikana-stuasie en die gevolge daarvan gee,” het Mantashe gesê.

“Ons gaan nie probeer doen wat die kommissie van ondersoek doen nie. Ons gaan kyk na die polities-ekonomiese gevolge van die verwikkelings (by Marikana) en die langtermyn-impak daarvan op die samelewing.”

Mantashe het verslaggewers by die St George's-hotel in Pretoria toegespreek.

Hy het bygevoeg dat die NUK kwessies rondom die ANC se eeufeesvieringe, wat deur die loop van die jaar plaasgevind het, ook sal bespreek.

Mantashe het gesê die groep sal probeer vasstel of die vieringe die gemeenskap gehelp het om die ANC se geskiedenis en die ANC self beter te verstaan.

“Ons kyk ook na voorbereidings vir die nasionale konferensie in Desember.”

Mantashe het gesê dat daar ten minste twee spesiale NUK-veragderings in die aanloop tot die nasionale konferensie sal wees om te verseker dat die nasionale konferensie self glad verloop.

Die NUK-vergadering sal glo tot 16 September aanhou.

– Volg Nuus24 op Twitter

 

- SAPA