Myn-krisis kring verder uit
2012-09-12 09:43
Johannesburg – Die krisis in die mynbedryf kring verder uit nadat 15 000 mynwerkers by Anglo Platinum op Rustenburg in die Noordwes ook begin staak het.
RSG berig die werkers van Angloplats het alle ingange na die myn se ses skagte versper. Hulle eis 'n basiese maandelikse salaris van R10 000 en nog ander byvoordele.
Willie Mataboge, ‘n woordvoerder vir die mynwerkersvakbond Num, het bevestig dat dit in dié stadium 'n onbeskermde staking is.
Werkers by die Lonmin-platinummyn op Marikana naby Rustenburg staak reeds langer as 'n maand, terwyl werkers by Goldfields se KDC-Wes-myn verlede Sondag opgehou werk het, het die radiostasie berig.
Goldfields het vroeër 'n hofbevel gekry om mynwerkers te dwing om terug te keer werk toe.
Sapa het vroeër berig Julius Malema het ‘n beroep op alle mynwerkers gedoen om aan ‘n landswye staking deel te neem.
Die geskorste leier van die ANC se jeugliga (ANCYL) het gesê ‘n landswye staking moet by alle myne gehou word totdat Num se leierskap bedank.
“Daar moet ‘n landswye staking by die myne wees totdat Frans Baleni [sekretaris-generaal van die vakbond] en die Num-leierskap met onmiddellike effek uitgetree het,” het Malema aan ‘n stampvol stadion by ‘n goudmyn van Gold Fields KDC naby Carletonville gesê. Altesaam 15 000 werkers van dié myn neem deel aan ‘n staking.
Eyewitness News het vroeër genoem dat tientalle mynwerkers wat nie staak nie, onlangs by ‘n veilige plek bymekaar gekom het nadat hulle deur stakende werkers gedreig is.
Werkers van Lonmin sê hulle vrees vir hul lewens, ten spyte van die behoefte om aan hul gesinne te voorsien.
Luidens die berig is talle voorvalle van intimidasie by verskeie skagte by die Noordwes se myndistrik aangemeld.
Volg Nuus24 op Twitter
