Muti-moordenaar sit lewenslank
2011-11-28 20:01
Pretoria– Familielede van die vermoorde skoolmeisie Masego Kgomo het gejuig toe die muti-moordenaaar Brian Mangwale Maandag deur die Hooggeregshof in Pretoria tot lewenslange tronkstraf gevonnis is.
Mangwale het geen emosie getoon nie en het liggies geglimlag na sy vonnisoplegging.
Regter Billy Mothle het Mangwale tot lewenslange tronkstraf gevonnis vir die moord in Desember 2009 op die 10-jarige skoolmeisie en ‘n verdere ses jaar tronkstraf opgelê omdat hy haar ontvoer het.
Daar was bewyse dat Kgomo steeds gelewe het toe haar baarmoeder en bors uitgesny was. Dit is later aan ‘n tradisionele geneesheer vir R4 800 verkoop.
Volgens Mothle het Mangwale gedurende sy verhoor geen berou getoon nie ten spyte daarvan dat hy ‘n hele paar erkennings oor die moord gemaak het. Hy het nooit aan die hof gesê wie sy medepligtiges was nie en het self deelgeneem aan die soektog na Kgomo al het hy geweet waar sy was.
Die regter het gesê die verkoop van liggaamsdele vir die gebruik van muti om persoonlike, finansiële of huweliksprobleme op te los is nog nooit effektief bewys nie.
Kgomo het op Nuwejaarsaand in 2009 spoorloos verdwyn nadat sy laas in Mangwale se geselskap gesien is.
– Volg Nuus24 op Twitter.
- SAPA