‘Musiekman het my gemolesteer’
2010-04-17 07:10
Johannesburg - Klagte van seksuele molestering is dié week teen ’n bekende in Afrikaanse musiekkringe gemaak nadat hy glo 18 jaar gelede ’n meisie gemolesteer het toe sy 12 jaar oud was.
Dizelle Viljoen (30), ’n huisvrou van Germiston, en haar man het Donderdag ’n klag van seksuele molestering teen dié man by die Germiston-polisiekantoor aanhangig gemaak.
Viljoen beweer die man het verskeie kere “aan my gevat” toe sy 12 jaar oud was.
Sy sê die “vattery” het “twee of drie keer in sy kantoor by die Randse Skou” in Nasrec, Johannesburg, gebeur, op drie verskillende aande in sy motor op pad na haar oupa-hulle se huis en een keer in haar oupa (nié die beweerde molesteerder nie) se huis.
Die man sou glo altyd aan haar been en private dele vat en sou kwaad raak as sy hom gekeer of weggeloop het.
Haar suster, Laurene, wat toe nege was, weet glo van als, het sy Vrydag gesê.
“Hy het laat ek aan hom vat en dan vat hy aan my. Maar dit het nie verder as dit gegaan nie. Ek het dit nie toegelaat nie,” het sy gesê.
“Die ergste was in my oupa se huis. Ek het op die bank gesit en hy het langs my kom sit. Hy het net ’n kort slaapbroek sonder ’n onderbroek aangehad en het my hand gevat en dit daarin gedruk dat ek met hom speel. Hy het my altyd vasgedruk en aan my gevat.”
Dié ma van twee het gesê die man sou altyd grappies maak of speel wanneer hy haar vasdruk. Volgens haar kon sy nooit haar ma of pa sê nie, want haar pa “sou hom doodgemaak het”.
Sy het gesê sy wou nog altyd vir haar man sê, maar “die tyd was nie reg nie. As ek nou vroue kan help om te praat oor die dinge, doen ek dit”.
Viljoen het gesê sy wou nooit alleen saam met haar molesteerder wees nie en was en is steeds bang vir hom.
Jan Viljoen, haar man, het Vrydag gesê hy is woedend en kwaad vir die man.
“Hoe kan hy dit aan ’n weerlose kind doen? Wat as hy dit met my jong dogter doen? Hy moet net eerlik met homself wees en roll with the punches,” het hy gesê.
Viljoen het gesê as hy en sy vrou intiem verkeer, kon hy voel “sy is nie daar nie”.
Die hoof van die seksuele misdrywe-eenheid by die Germiston-polisiekantoor het Vrydag bevestig ’n saak is teen die man aanhangig gemaak. Hy wou egter niks verder sê nie.
Die man self het Vrydagmiddag in reaksie bevestig dat die polisie oor die aanklag met hom in verbinding was.
“Die polisie het my ingelig oor ’n klag van onsedelike aanranding wat na bewering 18 jaar gelede plaasgevind het.
“Die aantyging word ten sterkste ontken en my regspan is reeds opdrag gegee om die saak verder te hanteer.”
- Beeld