Museum 'herhaaldelik' gewaarsku oor sekuriteit
2012-11-12 18:01
Pretoria – Die Pretoria-kunsmuseum is Maandag voorlopig gesluit ná gewapende rowers met skilderye ter waarde van R17,5 miljoen vort is.
Pieter de Necker, woordvoerder vir die burgemeester, het gesê die museum sal op 20 November heropen.
"Die kunsmuseum het voorkomende maatreëls ingestel deur ander waardevolle stukke te verwyder tot die polisie se ondersoek voltooi is," het hy gesê.
"Die stad sal veiligheidsmaatreëls by die museum verskerp."
De Necker het gesê vyf kunswerke is Sondag uit die museum se permanente versameling gesteel.
"Drie mans, wat voorgegee het dat hulle kunsstudente en 'n lektor was, het gevra om spesifieke skilderye te besigtig. Ná die skilderye aan hulle gewys is, het hulle die museum-beampte met 'n geweer gedreig en vasgebind, en hulle is vort met ses skilderye," het hy gesê.
"Hulle het een skildery [deur] Irma Stern agtergelaat. Dit was waarskynlik te groot om in hulle motor te pas."
Skilderye deur Maggie Laubser, Hugo Naude, JH Pierneef, Gerard Sekoto en Irma Stern is gesteel.
De Necker het gesê ander museums moet ook uit dié rooftog leer.
"Dis jammer dat die geslotekring-kameras nie hierdie naweek gewerk het nie. 'n Fout is Donderdag gerapporteer en is vandag herstel," het hy gesê.
"Sekuriteit by museums moet verbeter word," het hy gesê.
Die DA het intussen gesê hy het die metroraad herhaaldelik gewaarsku oor die gebrek aan voldoende veiligheidsmaatreëls by die museum.
"Ek het die Tshwane-metro lank al oor sy gebrek aan toewyding aan hierdie instelling gewaarsku," het Johan Welmans, 'n woordvoerder vir die party, gesê.
"Die indruk wat ek gekry het, is dat die Pretoria-kunsmuseum eenvoudig nie 'n prioriteit is vir die ANC-beheerde Tshwane-metro nie," het hy gesê.
– Volg Nuus24 op Twitter.
- SAPA
