Munisipale staking kos land miljoene
2009-07-28 12:30
Johannesburg – Die staking van die munisipale werkers kos die land minstens R15 miljoen per dag.
“Dit is baie moeilik om die koste te bereken. Ek kan nie die skade van al die winkeleienaars bereken nie, maar die koste in werkers se salarisse beloop sowat R15 miljoen,” het Mike Schussler, ‘n ekonoom, gesê.
Schussler het gesê hoe langer die staking voortgaan, hoe meer styg die koste.
“Teen die tweede week is dit ‘n groot probleem. Mense moet dan self opdok om hul vullis te verwyder.”
“As al dié faktore in ag geneem word, is R15 miljoen ‘n bietjie simplistes, maar dit is die beste wat ons nou kan doen,” het hy gesê.
Die getalle van die aantal werkers wat by die werk opdaag verskil ook.
Die vakbonde sê sowat 150 000 mense uit ‘n werkersmag van 190 000 het nie by die werk opgedaag nie, maar die Suid-Afrikaanse Vereniging van Plaaslike Owerhede (Salga) het gesê net 40% van die werkers neem deel aan dié stakingsaksie.
‘n Staking deur die South African Municipal Workers' Union en die Independent Municipal and Allied Trade Union het Maandag begin.
Duisende werkers het die strate ingevaar en vullisdromme uitgegooi en smouse geteister.
Die vakbonde eis ‘n salarisverhoging van 15%. Salga bied 13% aan.
SAPA