Munisipale kantore brand af, dokumente vernietig
2012-02-02 09:55
Durban – Belangrike dokumente wat benodig word vir ‘n forensiese ondersoek is heeltemal vernietig toe die kantoor van die Umkhanyakude-streekmunisipaliteit Donderdagoggend afgebrand het.
“Ek kan bevestig dat ons finansiële kantore vroeg vanoggend heeltemal deur ‘n brand verwoes is. Ons het al die dokumente verloor,” het burgemeester Jeff Vilane gesê.
Die munisipale kantore is in Mkuze in die noorde van KwaZulu-Natal.
‘n Munisipale bestuurder en ‘n hoof-finansiële beampte was ten tyde van die voorval geskors terwyl ‘n forensiese ondersoek aan die gang was, het Vilane gesê.
“Ons wil nie spekuleer oor die oorsaak van die brand nie. Dit kan ‘n elektriese fout wees,” het hy gesê.
Nietemin is Vilane bekommerd dat belangrike dokumente wat nodig is vir die ondersoek vernietig is.
“Alhoewel die inligting ook in rekenaars gestoor is, het jy harde kopieë van fakture wat onderteken is ook nodig wanneer jy die ondersoek loods,” het hy gesê.
Die ondersoek word gedoen deur ‘n forensiese span wat deur die provinsiale departement van samewerkende regering aangestel is om aantygings van wanadministrasie en bedrog te ondersoek.
Die brand het omstreeks 02:00 uitgebreek. Vilane was woedend dat dit te lank vir die brandweer geneem het by die toneel op te daag.
“Ons is baie ontevrede dat hulle te lank geneem het om uit te kom. Plattelandse metro-kantore is nie ver van ons munisipale gebou nie.”
– Volg Nuus24 op Twitter
- SAPA