Munisipale hoë verkla oor R7 miljoen
2011-06-25 10:15
Mpumalanga – R7 miljoen wat om die een of ander rede nie op die balansstate van die Thaba Chweu-munisipaliteit in Lydenburg verskyn nie, het tot strafregtelike klagte teen die dorp se waarnemende munisipale bestuurder gelei.
Dit volg nadat ’n forensiese ondersoek bevind het ’n motorhawe in Lydenburg wat as agent voorafbetaalde krag namens die raad verkoop, het na bewering nie die afgelope sewe jaar geld aan die raad oorbetaal nie.
Luidens ’n vertroulike verslag wat Beeld onder oë gehad het, is bevind dat die betrokke motorhawe nie eens ’n rekening by die stadsraad het nie en daar dus geen rekords van enige transaksies bestaan nie.
Sonja Boshoff, ’n DA-raadslid in die dorp, het Donderdag strafregtelike klagte teen die raad, asook Billy Ralebipi, die waarnemende munisipale bestuurder, aanhangig gemaak.
“Ralebipi het vroeër aan die raad gesê hy het klagte by beide die polisie asook die Valke aanhangig gemaak, maar ons kon geen rekords daarvan kry nie. Daarom het die DA besluit om nou diefstalklagte teen hom aanhangig te maak.”
Boshoff het gesê die aangeleentheid is ook onder die aandag van die presidensie gebring.
Thaba Chweu was die afgelope vyf jaar twee keer onder administrasie juis as gevolg van grootskaalse bedrog en korrupsie.
In April 2009 was die stadsraad ook onder skoot toe R3,2 miljoen in een dag uit die raad se bankrekening getrek is. Destyds is aangevoer dat kuberkrakers toegang tot die rekening gekry het en die geld onwettig daaruit onttrek het.
Bitter min van die geld is nog verhaal ten spyte daarvan dat verskeie personeellede van die raad afgedank is en ander intussen bedank het.
Die raad wou geen kommentaar oor die aangeleentheid gee nie omdat hulle sê die saak is sub judice.
– Volg Nuus24 op Twitter
- Beeld