Munisipale hoë terug op pos ná skorsing
2009-11-20 08:47
Alta Snyman
Rustenburg – Die hooggeregshof in Mafikeng het gister die geskorste munisipale bestuurder van die Rustenburg- plaaslike munisipaliteit met onmiddellike uitwerking in sy pos herstel.
Andries Boshoff het gesê hy is Maandag terug in die kantoor.
Hy is vroeër eers op spesiale verlof geplaas en toe deur Matthew Wolmarans, uitvoerende burgemeester, geskors nadat hy op omstrede wyse saam met nog ’n munisipale amptenaar in hegtenis geneem is.
Die inhegtenisnemings by die munisipale kantore in die stad is selfs deur ’n span van SAUK-TV-nuus verfilm en die aand gebeeldsend.
Die klag teen Boshoff was dat hy versuim het om op te tree nadat hy van ’n misdaad bewus geword het.
Dit is twee weke later stil-stil teruggetrek, maar die stadsraad het nie sy skorsing opgehef nie.
Sedertdien het alle navrae oor die skorsing wat aan die munisipaliteit en Wolmarans gestuur is onbeantwoord gebly. Die DA het ook meer as een keer vergeefs vrae daaroor gevra in die raadsvergaderings.
Die hof het gister ook ’n kostebevel uitgereik. Dit beteken die stad se belastingbetalers sal moet opdok vir Boshoff se regskoste. Dit sluit die dienste van ’n prokureur en ’n advokaat in.
Heelwat geheimsinnigheid omgewe die klag. Beeld het vroeër vasgestel ’n onbekende mens het die regering se teenkorrupsienommer gebel met beskuldigings teen onder andere Boshoff.
Die bewerings is deur die Noordwes-kantoor van die staatsdienskommissie aan Maureen Modiselle, premier, se kantoor gestuur vanwaar dit na die betrokke LUR verwys is.
Boshoff het gister by navraag gesê siviele eise kom teen die polisie.
- Beeld