Munisipale bestuurder bedank, kry steeds salaris
2011-06-02 14:13
Kaapstad – Die munisipale bestuurder van die Nama-Khoi-munisipaliteit op Springbok het bedank, maar sal drie maande se salaris en 21 verlofkrediete ontvang, het 'n woordvoerder Donderdag gesê.
Madeleinne Brandt het Woensdag haar bedanking ingedien, het Isaac Cloete, woordvoerder van die Nama-Khoi-munisipaliteit, Donderdag in 'n verklaring gesê.
"Sy was Dinsdag nog betrokke by die inswering van die nuwe raad en die verkiesing van die nuwe speaker en burgemeester," het Cloete gesê.
Die DA en Cope het 'n koalisie gevorm en beheer nou die Nama-Khoi-munisipaliteit.
Brandt het ná die uitslae van die verkiesing bekend gemaak is, reeds aangedui dat sy nie verder gaan deel wees van die munisipaliteit nie.
Sy het Woensdag samesprekings gehou met die nuwe speaker, Joshua Losper (Cope) en die nuwe burgemeester, William Cloete (DA).
Brandt het gesê niemand het haar tot dié stap gedwing nie en dat sy ook nie 'n goue handdruk verlang nie.
“Ek het uit persoonlike oorwegings besluit om te bedank en die speaker en burgemeester het dit so aanvaar. Losper en Cloete het uit hul eie besluit dat ek 3 maande se salaris plus verlofkrediete van 21 dae gaan ontvang.”
Onderhoude by die munisipaliteit is intussen tot verdere kennisgewing gestaak.
Die raad sal Dinsdag vergader om 'n waarnemende munisipale bestuurder aan te stel.
Volg Nuus24 op Twitter
- Nuus24