Munisipale bestuurder afgedank
2010-12-09 15:04
Johannesburg - Die munisipale bestuurder van die Madibeng-munisipaliteit in Noordwes, Phillemon Mapulane, is afgedank oor korrupsie en omkopery.
Die munisipale woordvoerder, Patrick Morathi, het Donderdag gesê Mapulane is skuldig bevind op 15 aanklagte van wangedrag, wat korrupsie en omkopery insluit wat tot R650 000 behels.
Morathi het gesê miljoene rande in vermiste fondse is tydens die ondersoek teruggevind.
“Strafregtelike prosesse is ook teen die voormalige munisipale bestuurder van stapel gestuur, asook teen die twee diensverskaffers wat hom omgekoop het. Verdere strafregtelike prosesse sal ook teen minstens nog twee munisipale beamptes van stapel gestuur word.”
Mapulane is in Oktober verlede jaar geskors en Augustus vanjaar in hegtenis geneem. Wanbestuur van tot R100 miljoen is in ‘n oudit onthul.
Morathi het gesê die saak van die geskorste hoof finansiële beampte, Nana Masithela, sal op 18 Januarie aangehoor word.
Masithela is in November vanjaar geskors weens bewerings van ernstige wangedrag.
Die munisipaliteit, wat Brits en Hartebeespoortdam insluit, is onder administrasie geplaas ná die ineenstorting van basiese dienslewering.
- Volg Nuus24 op Twitter
- SAPA