Munisipale beamptes se huise met petrolbomme aangeval
2012-01-23 14:00
Bloemfontein – Die huise van twee Ngwathe-munisipale beamptes in Parys is in petrolbom-aanvalle beskadig, het die polisie Maandag gesê.
Volgens woordvoerder Maseleka Langa is ‘n petrolbom omstreeks 01:00 Maandag na die huis van ‘n munisipale beampte gegooi.
“’n Venster is gebreek en gordyne het tydens die aanval aan die brand geslaan.”
Die huis van ‘n direkteur by die munisipaliteit is ook met ‘n petrolbom beskadig, maar die skade was nie so erg nie. ‘n Deel van ‘n dak in ‘n kamer is beskadig.
Niemand is nog teen Maandagmiddag in hegtenis geneem nie.
Twee sake van kwaadwillige beskadiging van eiendom sal ondersoek word.
Verskeie senior-amptenare in die Vrystaat-munisipaliteit word vir wanadministrasie ondersoek.
Die munisipaliteit se werkers het aan die einde van 2011 oor salarisse begin staak.
– Volg Nuus24 op Twitter
- SAPA