'Mulder probeer geskiedenis herskryf' – Mantashe
2012-02-21 12:05
Johannesburg – Gwede Mantashe, sekretaris-generaal van die regerende party, sê Pieter Mulder, leier van die VF+, probeer om Suid-Afrika se geskiedenis te herskryf.
Mantashe het in Johannesburg gepraat met die bekendstelling van die ANC se Eeufeesboek.
Mulder het vroeër in 'n parlementêre debat gesê swart mense het geen historiese aanspraak op 40% van die land se grondgebied nie, aangesien dele van die huidige Oos- en Wes-Kaap onbewoond was toe die blankes opgedaag het, het RSG berig.
Mulder het verlede week in die debat oor pres. Jacob Zuma se staatsrede gesê daar is sterk bewyse dat “Bantoe-sprekendes” nie oorspronklik van die Wes- en Noordwes-Kaap kom nie – ’n gebied wat 40% van die land se oppervlak beslaan, het Rapport onlangs berig.
Mulder het intussen gesê hy gaan nie as adjunkminister van landbou, bosbou en visserye bedank nie, al het Zuma verlede week in die parlement die vloer met hom gevee.
Die Burger berig Zuma het nog nooit die afgelope drie jaar iemand só heftig in die parlement geroskam nie.
Volg Nuus24 op Twitter