Muisplaag knaag aan boere se beursies
2010-08-26 08:15
Bethlehem – ’n Muisplaagontploffing in die Oos-Vrystaat knaag aan meer as net graanboere se geduld.
’n Plaag van rotagtige nagmuise, veldmuise en springhaasrotte, wat soos die mafia ondergronds te werk gaan, is letterlik besig om boere se winste in die Bethlehem-, Reitz-, Tweeling- en Frankfort-distrik op te vreet. Gebiede in Mpumalanga, die oostelike Hoëveld en die Wes-Kaap ly ook erg onder die probleem.
Onderskeidelik 50ha en 122ha se oeste van boere buite Bethlehem en Frankfort het onlangs skade gely.
Dr. Gerhard Verdoorn, direkteur van die Griffon-gifinligtingsentrum, wat gister boere by die Lionsrock Lodge buite Bethlehem kom toespreek het, sê een wyfiemuis en haar nageslag kan tot 3500 kleintjies oor ’n jaar kry.
Hy sê die muise verkies dit om in sanderige grond te teel en eet graag vars ontkiemde saad.
Verdoorn het die boere aangeraai om roofdiere, roofvoëls en reptiele hul vennote eerder as vyande te maak.
“’n Uil kan ’n muis tot 500m ver sien. ’n Paar nonnetjiesuile kan tot 67 muise per nag vang. ’n Tierboskat kan sewe tot agt muise per dag vang.”
Hy het boere aangeraai om ook hul plaaswerkers in te lig dat slange soos rinkhalse daarin spesialiseer om muise te vang.
Meerkatte, muishonde, vlei- en grasuile, bakoorvosse en jakkalse moet ook nie onderskat word nie.
“Die diere se natuurlike habitat moet nie vernietig word nie, maar bewaar word. Húlle vreet die muise en hou die plaag só onder beheer.”
Verdoorn sê slegs sekere soorte gif soos aluminiumfosfied-tablette, sinkfosfied-lokaas en Racumin-wasblokkies moet kundig en versigtig gebruik word om te verseker dat dit nie ander diere ook vergiftig nie.
Gif is remediërend, maar roofdiere is voorkomend.
Mense wat ongeregistreerde plaagdoders gebruik, kan vervolg word.
Metodes soos lokvalle en lokgewasse kan ook werk.
Tegnieke soos om hoë onbehandelde pale in die wenakkers op te rig kan as sitplekke vir die voëls dien.
Pale wat met teer geverf is, kan die voëls se pote brand wanneer dit warm word. Dit moet ook geen dwarspale hê wat weerstand in die wind bied nie. Die voël moet stil op die paal kan sit. Doringdraad is gevaarlik en moet eerder oor tyd vervang word met gladde draad sodat die voëls nie daaraan kan vassit nie.
* Boere kan Verdoorn by 082-446-8946 bel.
Volg Nuus24 op Twitter.