Marikana: Mthethwa stel eie advokaat aan
2012-11-08 17:02
Johannesburg – Nathi Mthethwa, minister van polisie, het sy eie regsverteenwoordiger aangestel om hom by die Farlam-kommissie te verteenwoordig, het sy woordvoerder Donderdag gesê.
“Daar is kwessies wat gedurende die loop van die ondersoek na vore gekom het wat toesighoudende en beleidsimplikasies kan hê,” het Zweli Mnisi gesê.
Mthethwa het as gevolg hiervan besluit om adv. Lindi Nkosi-Thomas aan te stel om hom te verteenwoordig op dae wat hy nie die kommissie se sittings kan bywoon nie.
“Die minister, as die uitvoerende gesag van die SAPD, het ‘n wettige plig binne beide ‘n wetgewende en toesighoudende raamwerk. Dit is waarom hy deurlopende terugvoering moet kry.”
Die kommissie, wat gelei word deur die afgetrede regter Ian Farlam, is aangestel om die Marikana-voorval te ondersoek.
Altesaam 34 mynwerkers is op 16 Augustus doodgeskiet toe die polisie op hulle losgebrand het tydens gewelddadige betogings buite Lonmin se myn in Marikana.
Mnisi het gesê dat die regspan nie by die kommissie se sittings aan argumentvoering sal deelneem nie, maar net as waarnemers sal optree.
“Dit sou ideaal wees as die minister daagliks by die sittings kon wees, maar as gevolg van sy werksverpligtinge is dit onmoontlik.”
– Volg Nuus24 op Twitter
- SAPA
